Pasta cu Agghia, Ogghiu e
Pipiruncinu |
Dintra un murtaru pistati quattru beddi spicchi d'agghia, un
ciuffiteddu di pitrusinu, mezzu pipiruncinu russu e sali di cucina quantu cci nni voli.
Pistati e ripistati e, a cosa fatta, junciti dintra lu stissu murtaru, un beddu biccheri
di ogghiu d'oliva di casa, riminannu e riminannu.
A vostru piaciri priparativi li spaghetti o li bucatini e appena cotti, stinnicchiatili
dintra 'na maidda bedda granni, jttatici lu pistu di supra 'nsemmula a un pugniddu di
pitrusinu sminuzzatu, riminati a duviri e 'mpiattati.
Pasta cu li Brocculi Riminati
|
Pigghiati li cimaroli di un brucculiddu e facitili vugghiri dintra
'na pignata cu l'acqua e sali.
A mezza cuttura, sculatili dintra 'n'autra pignata, mittiti li brocculi dintra un piattu e
sarvati l'acqua.
Ora pigghiati un tianu cu mezzu bicchieri d'ogghiu di casa e faciti suffriiri dui beddi
spichia d'agghia sminuzzata juncennu a tempu giustu, tri sarduzzi salati senza testa e
cuda, che faciti squagghiari dintra lu suffrittu.
A stu puntu squagghiativi dui beddi cucchiarati di pumadamuri concentratu e mittitilu
dintra lu tianu facennu cociri pi deci minuti.
Fattu chistu, pigghiati li brucculiddi e calatili dintra lu tianu, mittiti sali e pipi,
'ncuvicchiati e faciti cociri a focu lentu fina chi li brocculi sunnu tutti squagghiati.
Ora junciti un pugniddu di pignola e passulina allivisciuta e qualchi filiddu di zaffaranu
sciugghiutu dintra l'aqua cavuda.
Riminannu riminannu, scinniti lu tianu e faciti arripusari. Pigghiati l'acqua di li
brocculi, faciti spaccari lu vugghiu e jttati ddà dintra, mezzu chilu abbuccatu di
bucatini purtannuli a mità cuttura.
Scinniti la pasta, sculatila e sbarratila dintra lu tianu e a focu lentu, faciti cociri
ancora 'mmiscannu tutti cosi.
Dopo cinqu minuti livati lu tianu di lu focu, cummigghiatili a duviri e facitili ripusari
pi deci minuti.
Chistu è lu puntu giustu pi 'mpiattari e liccarivi l'ugna.
Priparativi lu solitu ragù cu 200 grammi di carni capuliata e dui
beddi caddozzi di sasizza svudiddata.
Facitivi cociri li lasagni e quannu sunnu pronti, stinnicchiatili dintra 'na maidda
jttannucci di supra lu ragù e un quartu di chilu di ricotta frisca di pecura.
Ammiscati a duviri tutti cosi e, fattu chistu, sparpagghiatici un pugnu di picurinu
saliatu. Si vi facissi piaciri, a postu di picurinu saliatu, mittiti la ricotta
salata.
Faciti vugghiri dintra 'na pighata cu acqua e sali un chilu di
finuccheddi di muntagna, sculatili a duviri sprimennuli dintra lu sculapasta e tagghiatili
a pizzudda pizzudda, senza scurdarivi di sarvari l'acqua di cuttura.
Pigghiati un tianu cu mezzu bicchieri dogghiu d'oliva e faciti suffriiri dui cipudduzzi
sminuzzati, junciti quattru sardi salati e facitili squagghiari dintra l'ogghiu.
Pigghiati ora un chilu di sarduzzi frischi, lavatili, sculatili, livatici la resca, la
testa e la cuda, tagghiatili a pizzudda e facitili rusulari dintra lu suffrittu.
A 'stu puntu, pigghiati li finuccheddi e mittitili dintra lu tianu, cu sali e pipi,
facennu cociri pi cinqu minuti abbuccateddi.
Contempuraniamenti pigghiati un pugniddu di passula allivisciuta nni lacqua cavuda, un
pugniddu di pignola e 'na bustina di zafferanu squagghiatu nni lacqua e jttati tutti 'sti
cosi dintra la salsa.
Pigghiati l'acqua di li finuccheddi, faciti spaccari lu vugghiu e cucitivi, ddà dintra,
600 grammi di bucatini. A mità cuttura, sculati la pasta e mittitila dintra lu
tianu cu la salsa e, riminannu e riminannu, facitila finiri di cociri.
Scinnitila, facitila ripusari 'n'anticchia, e 'mpiattati.
La Bon'Arma di me matri, 'ncapu la pasta ci saliava 'n'anticchia di pani grattatu,
rusulatu cu 'n'anticchia di ogghiu di casa, agghia sminuzzata, 'na cuchiaratedda di
zzùccaru e 'na pizzicatedda di sali.
Nnì liccavamu puru lu piattu.