Mittiti mezzu chilu scarsu di ciciri dintra 'na pignata d'acqua pi
tutta 'na nuttata e jtivi a curcari. A l'indumani pigghiati 'sta pignata cuntrullati chi
l'acqua sia sufficienti e si è lu casu juncitini ancora, mittiti sali e faciti cociri a
focu lentu mittennu un pizzicu di bicarbunatu.
Dintra un tianu di crita mittitici mezzu bicchieri d'ogghiu bonu, faciti suffriiri dui
cipudduzzi tagghiati fini fini, squagghiatici tri pumadamuri pilati e senza simenza,
mittitici puru quacchi pampinedda di rosamarinu, 'na pizzicata di pipiruncinu russu 'n
polviri, e a stu puntu pigghiati li ciciri cu tutta l'acqua di cuttura e jttatili dintra
lu tianu.
Riminati, scinniti e manciati.
Procurativi un chilu di tinnirumi, lavatili a duviri e facitili
vugghiri dintra 'na pignata cu l'acqua salata. A mezza cuttura sculatili e tagghiatili a
pizzudda pizzudda.
Dintra un tianu squagghiati dintra l'ogghiu d'oliva, sei filetti di sardi salati,
mittitici dui spicchiteddi d'agghia sminuzzata, mezzu chilu di pumadamuri pilati, sali e
pipi.
A puntu giustu, pigghiati li tinnirumi sminuzzati e jttatili dintra lu tianu juncennu
'n'autru mezzu litru d'acqua o di brodu.
Faciti cociri ancora pi cinqu minuti.
A parti priparativi l'attuppateddi o l'occhiu di pirnici, e quannu la pasta è quasi
cotta, mmiscatila cu li tinnirumi facennu dari l'ultimu vugghiuni, scinniti e 'mpiattati.
Pigghiati un chilu scarsu di favi sicchi di chiddi cucivuli e
mittitili dintra 'na pignata cu acqua salata pi 'na notti intera.
Appena è jornu, cu lu vostro commudu, pigghiati 'sta pignata accussì comu si trova e
mittitila supra lu focu; focu lentu e vampa moderata.
Appena li favi squagghianu scinnitili, ammaccatili cu 'na furchetta facennuni 'na bedda
crema; juncitici 'n'anticchia d'ogghiu di casa e manciati.
Si chiama puru 'maccu arriccutu" e la differenza consisti nni
lu fattu chi a mità cuttura aviti a junciri tri mazziteddi di finuccheddi di campagna.
Pi cuntu sò faciti cociri dintra 'n'autra pignata cu acqua salata e vugghenti, mezzu
chilu di attuppateddi, sculatila a mità cuttura e juncitila a li favi facennu cociri
tutti cosi 'nsemmula.
Appena pronti, jttatici dintra un cuppineddu d'ogghiu d'oliva di casa, riminati e
'mpiattati e, si nun vi liccati li punta di li jta, perdu la scummissa.
Si vi fa piaciri saliatici supra 'n'anticchia di caciucavallu.