Dintra mezzu litru d'acqua salata e fridda jttàtici 200 grammi di
farina di ciciri e cu 'na cucchiara di lignu riminati e riminati.
Pigghiati la pignata e sempri riminannu faciti còciri la farina finu a falla 'ncuddari
tutta.
A 'stu puntu pigghiati 'n'anticchia di pitrusinu tritatu e siminaticcillu dintra.
Ora scinniti la pignata, pigghiati li furmi di lignu fatti apposta e cu 'na palittedda
mittitici di supra la pasta e cantiatili 'sti furmi, una pi una, pi falli arripusari.
Friddi chi sunnu livati li panelli di la furma e jttatili dintra 'na padedda cu ogghiu di
semi vugghenti
Facitili natari 'ntra l'ogghiu rivutannuli a momentu giustu e scinnitili cavudi cavudi.
Passati cu un crivu di sita un chilu di patati vugghiuti e dopu
aviri 'miscatu 'n'anticchia d'agghia sminuzzata, 'n'anticchia di pitrusinu, sali e pipi,
cuminciativi a priparari li cazzilli longhi e grossi quantu lu vuliti, ma nè cchiù
longhi di lu vostru ditu mediu.
Pronti chi sunnu, mittitili a friiri dintra 'na padedda cu ogghiu di semi vugghenti.
A culuri giustu scinniti e mangiati. Si vi fa piaciri, passati li cazzilli dintra lu
biancu d'ovu sbattutu e supra lu pani grattatu, comu fannu nni la piana di Catania, e poi
friitili.
'Na dicina di alivi nivuri grossi e pulpusi a testa, lavatili e
sculatili e ora jttatili dintra 'na padedda cu 'na stizza d'ogghiu e 'n'anticchia d'agghia
pistata e facitili suffriiri appena appena.
A stu puntu allungati lu suffrittu cu mezzu biccheri di acitu di vinu e faciti svapurari a
focu lentu 'na bona parti.
Saliatici di supra un pugniddu di arianu e dopu un minutu li alivi fritti sunnu beddi e
pronti.
Manciatili cavudi cavudi.